话说，呢次好开心，有得出国！出得国都系坐大飞机啦，耶！哈哈，呢次惊喜无限啊！落机之后，就从机场高速飞向市区。惊喜1：新加坡不愧为花园国家，路两边嘅树全都呈伞型，即是话，成条路都可以响大树嘅照顾之下，响呢个热带国家，当然就可以消消暑啦。惊喜2：入住时候发现，原来我住嘅地方叫做Cityhall，政府大厦，就系话，呢度系市中心所在。而且……最惊喜嘅系，我所住嘅地方，居然系会场所在，我好开心啊，听课唔使行来行去，点都好方便。而且，最搞笑嘅系，和我同住个位同志唔系去左边，从另一个角睇来，我系一个人住一间房……从未试过咁正呢！楼下就系地铁站，仲要系可以有得转线嘅大站啊！当晚就去左行街街，然后，又随大流咁去左新加坡河边酒吧街见识下异国风情。惊喜3：去到异地，当然要买张电话卡啦，哈哈，新加坡电信嘅卡好正啊，居然可以漫游全世界，又可以响境内打免费IDD，只收本地电话费，嘻嘻，新元15元有18元话费，打到电话滴汗，打到我飞番国内都未打得完，劲……惊喜4：原定计划系去上课嘅，不过……行程安排实在系太好啦，从第二日开始就有好玩行程，上午当然就要乖乖听课啦，为免到走人个阵手忙脚乱无时间买，下午去左OrchardRd睇嘢同埋买嘢，好抵啊，Tourist买嘢有折，而且仲可以退税，仲送左好多好多赠品，开心ing！第三日嘅白天去左“飞禽公园”睇雀，不论系天上飞嘅，定系水上行嘅，只要系鸟类，就有份响呢个公园出现……至于夜晚，就去左夜间动物园，嗯，想起长隆夜间动物园，虽然已经成为左历史，但系觉得长隆更多动物睇。最搞嘢系个只狮子，居然好似人咁仰睡，听到人声，就拧个头过来睇睇，一只手本来搭响肚腩上，拧头个阵顺便用爪抓抓个肚，望一望，又再瞓番，成个人咁，黑嘛嘛，唔通嘢系人扮嘅？惊喜5：今次行程包括印尼民丹岛之行，嘻嘻，真估唔到我会晕船，因为大浪，不过听讲接近12月系最大浪嘅时候，当船突然一沉，oh，超晕啊！不过都总算挨到上岸，无咩激烈反应。上岛一睇，哇，好正啊，呢度典型热带雨林风情，去到酒店，居然有当地土著跳晒舞欢迎，劲啊！番到房间，咦，从未试过咁正，劲正，窗外系一个荷花池，围绕四周，仍然系一片养眼绿色…咁好环境，房间当然要好配合咁放左两张挨凳，俾人响窗边发呆，不过，仲有最重要嘅事情要做。自由活动时间……拿拿声就去海边及下拉。下午系退潮时候，水特别平静，水清到可以见到细沙，又白又细嘅靓沙……仲有，呢度水好到，响20cm嘅水深都有食指咁长嘅鱼游啊游，水质好纯净啊！晚餐系响一个好有中式风情嘅水上饭店用餐，噢，又系一餐超正嘅海鲜餐，比起Jumbo海鲜酒家，另有一番风味。惊喜6：就系，我返程航班系经HK飞三藩市，而且仲要系大大飞机747呢，虽然呢部机我总觉得有D问题，因为都未飞起，就已经摆下摆下，好似想散咁，不过人地准备飞三藩市，咁即是无问题啦。讲番机上食物啦，哈，侍候鬼佬真系唔同D，嘻嘻，除左味道劲靓之外，居然有雪糕食喔，从未试过飞机餐有雪糕食，睇包装系雀巢啦，但系，从未试过咁好味嘅雀巢，超级唔公平，市面都未买过咁靓嘅雀巢！仲有一个，名曰惊吓，就系，呢度747响落地个下，居然会好似汽车掷弯咁，成部机好似飘移嘅，全机人都甩到一边，唉，少坐飞机，真系未见过大蛇痾尿！然后，拖住疲惫的身体，搭车返回广州，唉，又系半夜番到屋企，1点半有多，拿拿声洗白白后就瞓觉啦。